Thal khaw thiang takah chawhnu tir lamah thlenkim nghah pahin kan committee members te chu huanah van dum pawl kulh mai hnuaiah an han thukhawm phawt a.
Rorel tur tul tul te an sawi hova. Chutihlaiin kan thalai ten chhun chaw an lo buatsaih a. Chawhnu dar hnih vel a rik chuan chhun chaw zangkhai tak kan kil hova, Dailuah leh Chhangthawp butter tah te kham takin kan ei hova. Tv Rinawma, Tv David, Tv Zorema, Tv Reuben te lunch buaipuiin an tangkai hle. Chutia tlai taka chhun chaw kan ei kham chuan kan program pawh chu tihkhawmuan awm tawh lovin kan tan ta a.
He retreat hi UK Zofate’n Dr Mani sawmna chhanga buatsaih a ni a. UK Zofate member, a bik takin thalaiten Chhandamna thu ah intuaitharna leh harhtharna kan neih theih na tura buatsaih a ni. Beisei ang em em in mi rawn kal tha lo mahsela, mi 25 vel chu kan ni ta tho va, a lawmawm takzet a ni. Pu Zaia te chhung pawh lam hla tak Birmingham atangin an rawn kal vang vang a, a phusa berah an rawn tang bawk a, a lawmawm hle a ni. An ni hi 40 days prayer and fasting lo ti zo chian an ni bawk a thlarau in an khat hle a, kan retreat min tih phuisuitu tak ah Lalpan a hmang.
Program duan lawk te pawh awm tho mahse tum ang taka kan tan hma theih takloh avangin, kan chairman Dr Zaichhawna Hlawndo chuan tul a tih dan angina hun a kaihruai ta a. Zaihona te kan neih hnu in, tawngtairualna in kan tan a. A ri in mitin te chuan thinlung inhawng takin Lalpa kan kova. Kan tawngtaina ah Lalpa’n hun rawn hmangin thlarau thianghlimin min awmpui a ni tih a hriat theih hle a ni.
A in neitu Dr Mani’n inkhawm hawnna tawngtaina leh chhandamna thu tha tak a rawn sawi a. Chhandamna hi a pek a pek kan nih tawh thu leh, kan duh a thu a neih mai thei kan nihzia thu te a rawn sawi a. Hriatthiam awlsam takin chhandamna a rawn sawifiah a ni. Tin UK ah hian zofaten hmabak kan ngah zia leh kan tum tlat chuan kan tih theih tur a tam zia thu te a sawi bawk. Rilru a chawk thovin ngaihtuah a ti thui hle. Tichuan inkhawm kaihruaitu Pu Zaia’n kan inkhawm kalhmang te rawn sawifiahnin, thu tha tak a rawn zep nghal bawk a. A mimal takin Pathianin a lo kaihruai thin dan te. Lei ropuina lam te zawn a lo awl zia leh hetianglam enghelh lova Lalpan ti tura min tih te ti mai tur kan nih zia leh amah rin ngam a tul zia te, a nun example te pe in a rawn sawi a, tin UK zofate’n ke pen na tur kan ngah zia te a rawn tuihnih bawk a, a ngaihnawm hle a ni.
Hemi ni hian kan UK Zofate Chairman Pu Kiamlova’n min rawn ho thei bawk a, a ni in Abrahama Lalpan a lo hruai thin dan te a thailang a. Tin amah Pu Kiamlova a naupan lai ata Lalpa nen an lo in dawr thin dan te a sawi a. MNF rammu atangin, Missionary ah, chuta tangin Salvation Army Asia Commander thlengin a lo chawisan dan te a sawi a, a ngaihnawm tazet a ni. Evan Pu Valtea’n Isaia chanchin atanga kristian ten kan zir tur te rawn thailangin, kristian te kan nun kan fimkhur a tul zia a rawn sawi a. A bengvarthlak hle a ni. Zoram ah pawh rawng lo bawl nasa tawh tak Pu Valtea UK Zofaten kan nei hi a vanneih thlak hle thin a ni.
UK Zofate founding member Pu Jimmy Pachuau in a ma nun ah Lalpa in a lo kaihruai tohna te, harsatna, chhiatna leh hrehawmna karah Lalpa chu rin tlat tlak a ni tih a rawn thailang a, a ngaihnawm hle. Sharing neihna hun hmanhmawh lo taka neih a ni bawk a. Hetah hian Nl Feli Hlawndo, Tv Martin, Tv Zatea leh Tv Zorema ten share na hun an hmang a. Nl Feli’n a zirlai atan Pathian in kawng a lo kawhmuh thin dan te a sawi a. Tv Martin leh Tv Zatea ten hla leh Bible chang an thinlung khawih zawng leh an thinlung a khawih chhan te ngaihnawm takin an sawi a. Tin Tv Zorema’n a testimony ngaihnawm takin a sawi bawk a, thinlung an khawih hle a ni.
Tin kan vannei em em a, zaithiam te kan nei tha em em a. Nl Felicia Singson te, Tv Zatea te, Tv Reuben te leh Pi Daduhi ten Pathian fakna hla mawi tak takin a khat tawkin min awi reng bawk a, a vanneih thlak takzet a ni. Pi Dadhui’n Amazing Grace an sa pheih chu kan hnuk a ulh tep hlawm a ni. Hlawndo sisters pawh zai tura inring reng an ni a, nimahsela kan chair leh an pa Pu Zaia’n retreat kan neih leh hun atan tiin a khek ta zawk a ni.
Pu RS-a te nupa pawh veng hla tak atangin rawn telin an rawn phur hle a. An nu Pi Aree pawh mizo tawng thiamlo e tilo chuan phur takin a tel tluan zak a, hla kan sakho te in hla bu chhiarin a zai a, Bible kan chhiar lahin English Bible ah te lo en in, inhawng takin a tel a, an nupa in min ti kimchang hle a ni. Tin Pu Hruaitea pawh an naute bawm nen a rawn in nawr thleng thak bawk a, chhangchiat a lo hnehsawh ber a ni. An chhungin hlim takin min rawn tel pui thei a a lawmawm hle a ni.
Tlai dar sarih vel a lo rik chuan kan inkhawm chu khamlo hle mah ila hawnna lam hla tak tak la kal tur te kan awm avangin bang lo thei kan ni ta lova. Tichuan ban zai kan rel ta a. Tv Rinawma leh a thianten vawksa leh arsa ruai tui taka an lo buatsaih chu kan ei hova, kan tlai hle a ni. Arsa kan phei chu Dr Mani’n a bul atanga a tawp thlengin ama kutke ngata a siam a ni nghe nghe awm e. Ani hi kan member zinga senior ber e tilo chuan choka lamah a in hmang nasa hle a, a hma ni atangin khel lovin chawhmeh tur lam khawm leh chan te Nl Arimteii nen an lo buaipui nasa hle a ni.
Mi sawmhnihpanga rual ni e tilo chuan chutia chaw kan han ei tan chu kan reh thiap mai a ni. Tin Tv Reuben an awlsam takin sobji te a rawn kang bawk a, tin kan nula tlangval ten a senghoi ah te an inpui tlang veka, a hmuhnawm suau suau khawp mai. Hetianga nula tlangval mawng zang leh tlawmngai tak tak kan nei te hi a vanneihthlak hle a ni.
Hetia nileng deuh thaw a Pathian biakhona kan han nei thei hi a lawmawm takzet a ni. A tel zawng te hi kan kal lam aiin kan haw lam chu kan hlawk haw takzet theuh a ni. Kan khamlo hle theuh nghe nghe a, Lalpan hun rawn changing, hetia hun duhawm tak min rawn pe hi kan lawm hle a. UK Zofate senior members te phei chuan a khat tawka tih fo a tha hle in an ngai, quarterly tal te chuan kan tlin mai theih te pawh kan beisei. Tin inphal taka a in min hman tirtu leh a tir taka min sawm khawm tu Dr Mani chungah pawh UK zofate kan lawm hle. A tel a zawng te thlarau takin kan hlawk hle a ni. Lalpa chu fakin awm rawh se.